Laoreport: ຄວນຢູ່ໃນຄວາມພໍດີກ່ອນໃບປະກາດຈະເຫລືອຄ່າຫນ້ອຍກວ່າ

ຕອນເຊົ້າຂອງວັນທີ 13 ກັນຍານີ້, ເຖິງວ່າສະພາບອາກາດຈະມືດຄຶ້ມ ແລະ ຝົນຕົກລິນລົງມາຢ່າງບໍ່ຂາດສາຍ, ແຕ່ຢູ່ມະຫາວິທະຍາໄລແຫ່ງຊາດ (ດົງໂດກ) ກໍແອອັດໄປດ້ວຍພາຫະນະ ແລະ ຄົນຈຳນວນຫລວງຫລາຍຍ້ອນແມ່ນມື້ຮັບ ໃບປະກາສະນີຍະ ບັດຂອງນັກສຶກສາມະຫາວິທະຍາໄລແຫ່ງດັ່ງກ່າວ. ປີນີ້ມີນັກສຶກສາຮັບໃບປະກາດຫລາຍເກືອບ 7 ພັນຄົນ ແລະ ຍາດພີ່ນ້ອງທີ່ມາຮ່ວມສະແດງຄວາມຍີນດີກໍມີຫລາຍສົມຄວນເລີຍເຮັດໃຫ້ບໍລິເວນທີ່ກວ້າງຂວາງແຫ່ງນັ້ນຄັບແຄບເຂົ້າຢ່າງທັນຕາ.

ແນ່ນອນວ່າ,ພາຍຫລັງສີ້ນສຸດການຮັບໃບປະກາດແລ້ວ, ສິ່ງສຳຄັນຂວາງໜ້າຂອງບັນ ດິດໃໝ່ທັງຫລາຍບໍ່ຄ່ອຍພາດ ແມ່ນ “ງານລ້ຽງສັງສັນ” ເພື່ອສະຫລອງໃຫ້ແກ່ຜົນສຳເລັດທາງການສຶກສາທີ່ຕົນເອງສາມາດສູ້ຊົນ ຍາດມາໄດ້ໃນຜ່ານມາ. ງານລ້ຽງນີ້ ຈະ ຈັດນ້ອຍ-ໃຫຍ່ ຊ່ຳໃດແມ່ນຂຶ້ນກັບເງື່ອນໄຂຖານະການ ເງິນຂອງໃຜລາວອັນນີ້ເວົ້າກັນບໍ່ໄດ້? ແຕ່ສັງເກດເຫັນຜ່ານມາກໍຄືວ່າ:ການຈັດງານລ້ຽງນັ້ນ,ສ່ວນໜຶ່ງກໍເຫັນ ວ່າສົມມາພາຄວນກໍພໍ,ແຕ່ສ່ວນຫລາຍແມ່ນມີລັກສະນະໂລດໂຜນຟຸມເຟືອຍ ເກີນຂອບເຂດ, ບາງຄົນເຮັດເກີນຄວາມສາມາດຂອງຕົນ, ບາງຄົນບີບບັງຄັບພໍ່ແມ່ໃຫ້ຊອກທຸກວິທີເພື່ອໃຫ້ໄດ້ເງິນມາສະໜອງ ຕອບຄວາມກະຫາຍ ການຈັດງານລ້ຽງຂອງລູກທັງໆທີ່ມັນກໍບໍ່ໄດ້ເພີ່ມຄຸນຄ່າອັນໃດໃຫ້ກັບ ໃບປະກາດນັ້ນເລີຍ ນອກຈາກຄຳຍ້ອງຈາກຜູ້ທີ່ໄດ້ກິນນຳ, ກົງກັນຂ້າມຜົນເສຍພັດມີຫລາຍກວ່າ ເຊັ່ນ:ເສຍເງິນໂດຍເປົ່າປະໂຫຍດ ຫລື ບາງຄົນດື່ມກິນຫລາຍຈົນມຶນເມົາສຸດທ້າຍເກີດອຸປະຕິເຫດຕາມທ້ອງຖະໜົນຈົນ ເສຍຊີວິດກໍມີໃຫ້ເຫັນມາແລ້ວ.

ແນວໃດກໍຕາມ, ຍົກບັນຫານີ້ຂຶ້ນມາກໍເພື່ອສ່ອງແສງ ແລະ ເຕືອນໃຫ້ນັກຮຽນ-ນັກສຶກສາທັງຫລາຍໄດ້ມີຄວາມເຂົ້າໃຈວ່າອັນໃດຄືສິ່ງທີ່ຄວນ ແລະບໍ່ຄວນເຮັດ, ໃຫ້ເຫັນໄດ້ຄວາມປະຢັດມັດທະຍັດ,ຫລີກເວັ້ນບັນຫາການມົ້ວສຸມຫລີ້ນກິນຟຸມເຟືອຍບໍ່ວ່າຈະໃນໂອກາດໃດກໍຕາມ ແລະ ຄວນຄຳນຶງເຖິງວ່າ ກ່ອນຈະຮຽນຈົບຈົນໄດ້ໃບປະກາດກໍໃຊ້ເວລາຫລາຍປີ,ພໍ່ແມ່ ໄດ້ສູ້ຊົນເຮັດວຽກໜັກເພື່ອຊອກຫາເງິນຄຳ-ວັດຖຸ ຢືນສົ່ງໃຫ້ລູກໄດ້ຮ່ຳຮຽນສູງໆ ເພື່ອໃຫ້ເປັນຄົນດີຂອງສັງຄົມ,ມີຄວາມຮູ້ຄວາມສາມາດ ເພື່ອປະ ກອບສ່ວນພັດທະນາປະເທດຊາດ ແລະ ຄອບຄົວ.ບໍ່ດັ່ງນັ້ນ ໃບປະ ກາດທີ່ເຮົາໄດ້ຮັບໃນມື້ນີ້ ມັນອາດມີຄ່າໜ້ອຍກວ່າໃບຜັກກາດໃນມື້ໜ້າກໍເປັນໄດ້.