Laoreport: ຍ້ອນຫຍັງການສະຫລອງວັນສິ່ງແວດລ້ອມໂລກ 5 ມິຖຸນາປີນີ້ ຈຶ່ງເນັ້ນເຖິງບັນດາປະເທດເກາະດອນນ້ອຍ

ສະພາມົນຕີຂອງອົງການສະຫະປະຊາຊາດ ໄດ້ອອກຖະແຫລງການວ່າ: ວັນສິ່ງແວດລ້ອມໂລກ 5 ມິຖຸນາ 2014 ນີ້ ແມ່ນກົງກັບປີສາກົນຂອງບັນດາປະເທດເກາະດອນນ້ອຍທີ່ພວມພັດທະນາ ເພື່ອໃຫ້ປະຊາຄົມໂລກໄດ້ຍົກສູງຄວາມຮັບຮູ້ ແລະ ມີຈິດສຳນຶກກ່ຽວກັບການປົກປັກຮັກສາປະເທດເກາະດອນນ້ອຍເຫລົ່ານັ້ນ ເຊິ່ງແມ່ນຫົວຂໍ້ທີ່ສຳຄັນຈະໄດ້ນຳໄປປຶກສາຫາລືຢູ່ໃນລະດັບໂລກກ່ຽວກັບວິທີການວ່າຈະເຮັດແນວໃດ ເພື່ອບັນ ລຸເປົ້າໝາຍຄວາມຍືນຍົງໃນອະນາຄົດສຳລັບໝົດທຸກຄົນຢູ່ໃນໂລກ.

ໃນປັດຈຸບັນນີ້ ມີປະຊາກອນໂລກຫລາຍກວ່າ 63 ລ້ານຄົນ ທີ່ອາໄສຢູ່ໃນບັນດາປະເທດເກາະ ດອນນ້ອຍ ເຊິ່ງເປັນແຫລ່ງທ່ອງທ່ຽວທຳມະຊາດ ແລະ ວັດທະ ນະທຳທີ່ມີຊື່ສຽງເຊັ່ນ: ມີແຫລ່ງທຳມະຊາດທີ່ງົດງາມ ແລະ ໂດດເດັ່ນ, ມີດົນຕີພື້ນເມືອງທີ່ໜ້າປະທັບໃຈ ແລະ ມີຄວາມອຸດົມ ສົມບູນທາງດ້ານວັດທະນະທຳຢູ່ທົ່ວທຸກມຸມໂລກ. ປະເທດເກາະ ດອນເຫລົ່ານັ້ນ ມີບົດບາດສຳຄັນໃນການປົກປັກຮັກສາມະຫາສະ ໝຸດ, ມີຊັບພະຍາກອນທຳມະຊາດທີ່ອຸດົມສົມບູນທີ່ສຸດ, ມີ ແຫລ່ງຊີວະນາໆພັນທີ່ຫລາກຫລາຍ ແລະ ເຕັມໄປດ້ວຍພັນພືດ ແລະ ສັດສາວາສິ່ງທີ່ມີຄຸນຄ່າຫາຍາກຂອງໂລກອາໄສຢູ່.

ເຖິງວ່າຈະມີຄວາມອຸດົມ ສົມບູນປານໃດກໍຕາມ, ບັນດາປະເທດເກາະດອນນ້ອຍທີ່ພວມພັດທະນາຍັງຜະເຊີນກັບສິ່ງທ້າທາຍ ຫລາຍຢ່າງ ເປັນຕົ້ນຄວາມອາດສາມາດຂອງພວກເຂົາຍັງຕ່ຳ ຍ້ອນການຢູ່ຫ່າງໄກຂອງພວກເຂົາ ເຊິ່ງເປັນສ່ວນໜຶ່ງໃນເມື່ອສະພາບການຂອງໂລກມີການປ່ຽນແປງ; ການນຳເຂົ້າສິນ ຄ້າໄດ້ມີລາຄາແພງ ໂດຍສະເພາະພະລັງງານ ແລະ ມີຂໍ້ຈຳ ກັດກ່ຽວກັບການແຂ່ງຂັນທາງດ້ານອຸດສາຫະກຳການທ່ອງ ທ່ຽວ. ບັນດາປະເທດເກາະດອນນ້ອຍເຫລົ່ານີ້ຍັງມີຄວາມສ່ຽງຫລາຍຈາກສະພາບການ ປ່ຽນແປງດິນຟ້າອາກາດ, ໃນເວລາເກີດພາຍຸທີ່ຮ້າຍແຮງຈະເຮັດໃຫ້ລະດັບນ້ຳທະເລສູງຂຶ້ນ ເຊິ່ງອາດຈະເຮັດໃຫ້ເກີດໄພນ້ຳຖ້ວມຮ້າຍແຮງ ແລະ ບັນດາປະເທດເກາະ ດອນນ້ອຍເຫລົ່ານັ້ນ ອາດຈະຈົມລົງພື້ນທະເລໃນອະນາຄົດ.

ບັນດາ ປະເທດເກາະດອນນ້ອຍທີ່ພວມພັດທະນາ ບໍ່ໄດ້ສ້າງບັນຫາເຮັດໃຫ້ມີການປ່ຽນແປງດິນຟ້າອາກາດເຊັ່ນ: ການປ່ອຍອາຍພິດເຮືອນແກ້ວຂອງພວກເຂົາຖ້າເອົາມາລວມກັນ ແມ່ນໜ້ອຍກວ່າໜຶ່ງສ່ວນຮ້ອຍຂອງການປ່ອຍທາດອາຍພິດເຮືອນແກ້ວໃນ ໂລກ, ແຕ່ທີ່ຕັ້ງຂອງປະເທດເຫລົ່ານັ້ນພັດຕັ້ງຢູ່ແຖວໜ້າ ເຊິ່ງມີຫລາຍໂຄງການທີ່ຈະຕ້ອງນຳໄປປຶກສາຫາລື ເພື່ອສ້າງຂໍ້ຕົກລົງໃໝ່ໃນລະດັບໂລກກ່ຽວກັບການປ່ຽນແປງດິນຟ້າອາ ກາດ ໃນປີ 2015. ໃນປັດຈຸບັນ ໄດ້ມີຫລາຍປະເທດໄດ້ເປັນແບບ ຢ່າງໃນການກຽມພ້ອມ ເພື່ອປ້ອງກັນໄພທຳມະຊາດ ເຊິ່ງໄດ້ຈັດຕັ້ງປະຕິບັດຕົວຈິງ ເພື່ອບັນລຸການສ້າງຜົນກະທົບເຮັດໃຫ້ອຸນ ຫະພູມເພີ່ມຂຶ້ນ ໂດຍການນຳໃຊ້ພະລັງງານທົດແທນ ແລະ ວິທີການອື່ນໆ.

ບັນດາ ປະເທດເກາະດອນນ້ອຍທັງຫລາຍໄດ້ມີຄວາມເຂົ້າໃຈກັນວ່າ: ພວກເຮົາມີຄວາມຈຳເປັນຕ້ອງສ້າງໂລກຂອງພວກເຮົາໃຫ້ໄປຕາມທິດທີ່ ມີຄວາມຍືນຍົງ ເພື່ອເຮັດໄດ້ແນວນັ້ນ ຈຶ່ງຮຽກຮ້ອງໃຫ້ມີການຮ່ວມມືກັນຈາກທຸກພາກສ່ວນຂອງສັງຄົມໃນທົ່ວ ໂລກ ຈົ່ງພ້ອມກັນຄິດ ແລະ ພ້ອມກັນປະຕິບັດ. ດັ່ງນັ້ນ ເນື່ອງໃນໂອກາດສະເຫລີມສະ ຫລອງວັນສິ່ງແວດລ້ອມໂລກປີນີ້ ຈຶ່ງໄດ້ກຳນົດເອົາຫົວຂໍ້ຄືດັ່ງ ກ່າວ ພ້ອມທັງຮຽກຮ້ອງໃຫ້ບັນ ດາບຸກຄົນ, ຊຸມຊົນ ແລະ ບັນດາທຸລະກິດຕ່າງໆໃນທົ່ວໂລກຈຳ ນວນຫລາຍລ້ານຄົນເຂົ້າຮ່ວມກັບບັນດາໂຄງການຕ່າງໆຢູ່ຂັ້ນ ທ້ອງຖິ່ນ, ເລີ່ມຈາກຂະບວນ ການອະນາໄມ, ການສະແດງສິລະປະເພື່ອປຸກລະດົມຂະບວນ ການປູກໄມ້ ແລະ ການປົກປັກຮັກສາທຳມະຊາດ ແລະ ຮຽກ ຮ້ອງໃຫ້ໝົດທຸກຄົນຈົ່ງຄຳນຶງເຖິງຄວາມປາດຖະໜາຂອງບັນ ດາປະເທດເກາະດອນນ້ອຍທີ່ພວມພັດທະນາເຫລົ່ານັ້ນ ແລະ ໃຫ້ການຊ່ວຍເຫລືອພວກເຂົາໃຫ້ຫລຸດພົ້ນອອກຈາກບັນຫາການປ່ຽນແປງດິນ ຟ້າອາກາດ ໂດຍການສ້າງຄວາມອາດສາມາດໃນການປັບຕົວ ແລະ ການຫລຸດຜ່ອນຜົນກະທົບຈາກການປ່ຽນແປງດິນຟ້າອາກາດດັ່ງກ່າວ ເພື່ອໃຫ້ປະເທດເຂົາເຈົ້າມີຄວາມໝັ້ນຄົງໃນອະນາຄົດ, ພ້ອມກັນອອກແຮງປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມໃຫ້ຍືນຍົງ, ສະກັດກັ້ນ ການເພີ່ມຂຶ້ນຂອງລະດັບນ້ຳທະເລ ເພາະວ່າໜ່ວຍໂລກຂອງພວກເຮົາຍັງມີຫລາຍເກາະດອນທີ່ຢູ່ກະແຈກກະຈາຍ ຕາມມະຫາສະໝຸດ ພວກເຮົາຈຶ່ງມາຮ່ວມແຮງຮ່ວມໃຈກັນຊ່ວຍເຫລືອບັນດາເກາະດອນ ເຫລົ່ານັ້ນໃຫ້ຫລຸດພົ້ນຈາກວິກິດການໄພນ້ຳຖ້ວມ.