Laoreport: ສອງແມ່ລູກຊາວລາວຖືກແກ໊ງຄົນຮ້າຍຍັດຢາບ້າຈັບຮຽກຄ່າໄຖ່ໂຊກດີຕຳຫລວດໜອງຄາຍຊ່ວຍເຫລືອສຳເລັດ

ສອງແມ່ລູກຊາວລາວຖືກແກ໊ງຕຳຫລວດອຸດອນຍັດຢາບ້າຈັບຮຽກຄ່າໄຖ່ ເພື່ອແລກກັບການບໍ່ດຳເນີນຄະດີ ໂຊກດີຕຳຫລວດແຂວງໜອງຄາຍຊ້ອນແຜນໃຫ້ການຊ່ວຍເຫລືອສຳເລັດ.

ສຳນັກຂ່າວໄທຣັດຂອງໄທ ລາຍງານໃນວັນທີ 27 ເມສານີ້ວ່າ: ໃນມື້ວານນີ້ (26 ເມສາ) ເວລາ 19:00 ໂມງ ທີ່ດ່ານຊາຍແດນຂົວມິດຕະພາບລາວ-ໄທ ແຂວງໜອງຄາຍ, ເຈົ້າໜ້າທີ່ຕຳຫລວດໄທນຳໂດຍທ່ານ ພົນຕີ ຊູຣັດ ປານເຫງົ້າຜູ້ບັນຊາການຕຳຫລວດແຂວງໜອງຄາຍ ໄດ້ນຳກຳລັງເຂົ້າຈັບກຸມຮ້ອຍເອກ ສຸຣະພັດ ເພັນສີ, ຮ້ອຍໂທ ພີຣະພົງ ຕຣີພົງ, ຮ້ອຍຕີ ສົມເດັດ ສຸກຣົມ ພ້ອມພົນຕຳຫລວດອີກ 3 ຄົນ ເຊິ່ງເປັນເຈົ້າໜ້າທີ່ຕຳຫລວດສັງກັດຢູ່ແຂວງອຸດອນທານີ. ນອກຈາກນັ້ນ ຍັງມີຕຳຫລວດອາສາສະໝັກ 1 ຄົນ ແລະ ພົນລະເຮືອນອີກ 1 ຄົນ (ລວມທັງໝົດ 8 ຄົນ) ພ້ອມຂອງກາງອາວຸດປືນສັ້ນ 7 ກະບອກ, ປືນລູກຊອງຍາວ 1 ກະບອກ, ເງິນສົດ 300.000 ບາດ, ຢາບ້າ 108 ເມັດ, ຢາໄອ 1 ຖົງ, ລົດກະບະ 2 ຄັນ ແລະ ລົດເກັງອີກ 1 ຄັນ.

ການເຂົ້າຈັບກຸມແກ໊ງຕຳຫລວດດັ່ງກ່າວນີ້ ແມ່ນເນື່ອງຈາກໃນເວລາ 11:00 ໂມງ ຂອງວັນດຽວກັນ ໄດ້ມີນາງ ພວງມາລີ ຕັນທະແກ້ວ ອາຍຸ 20 ປີ ຢູ່ເມືອງສີໂຄດຕະບອງ ນະຄອນຫລວງວຽງຈັນ ສປປ ລາວ ໄດ້ເຂົ້າແຈ້ງຄວາມຕໍ່ ພົນຕີ ຊູຣັດ ປານເຫງົ້າ ທີ່ໜອງຄາຍ ເພື່ອຂໍການຊ່ວຍເຫລືອ ໂດຍໃນຕອນແລງຂອງວັນທີ 25 ເມສານີ້, ແມ່ຂອງຕົນຊື່ນາງ ບົວຈັນ ຕັນທະແກ້ວ ອາຍຸ 55 ປີ ແລະ ນ້ອງຊາຍຊື່ທ້າວ ພອນສະຫວັນ ຕັນທະແກ້ວ ອາຍຸ 14 ປີ ໄດ້ເດີນທາງມາແຂວງໜອງຄາຍ ແຕ່ໄດ້ຖືກກຸ່ມຄົນທີ່ອ້າງວ່າເປັນເຈົ້າໜ້າທີ່ຕຳຫລວດອຸດອນທານີເຂົ້າຈັບກຸມທັງສອງຄົນ ແລ້ວຕັ້ງຂໍ້ຫາຄ້າຢາບ້າທັງໆທີ່ຕົນ ແລະ ຄອບຄົວບໍ່ເຄີຍມີສ່ວນກ່ຽວຂ້ອງກັບຢາເສບຕິດ ເຊິ່ງກຸ່ມຄົນດັ່ງກ່າວໄດ້ໃຫ້ແມ່ຂອງຕົນໂທ ລະສັບມາຫາ ແລະ ໃຫ້ນຳເອົາເງິນຈຳນວນ 2 ລ້ານບາດ ມາໄຖ່ຕົວ ຖ້າບໍ່ດັ່ງນັ້ນ ແມ່ ແລະ ນ້ອງຊາຍຈະຖືກນຳຕົວສົ່ງສະຖານີຕຳຫລວດເພື່ອດຳເນີນຄະດີ.

ດ້ານເຈົ້າໜ້າທີ່ຕຳຫລວດແຂວງໜອງຄາຍ ໄດ້ວາງແຜນໃຫ້ການຊ່ວຍເຫລືອ ແລະ ຈັບກຸມແກ໊ງຕຳຫລວດດັ່ງກ່າວ ໂດຍໄດ້ໃຫ້ນາງ ພວງມາລີ ທຳທ່າໂທລະສັບຕໍ່ລອງຄ່າໄຖ່ຈາກແກ໊ງດັ່ງກ່າວ ຈົນຄ່າໄຖ່ໄດ້ຫລຸດລົງມາເຫລືອ 300.000 ບາດ ແລ້ວທັງສອງຝ່າຍໄດ້ຈັດຈ່າຍເງິນຄ່າໄຖ່ໃຫ້ກັນ ໃນເວລາ 19:00 ໂມງ ທີ່ບ່ອນຈອດລົດໃກ້ກັບດ່ານກວດຄົນເຂົ້າເມືອງແຂວງໜອງຄາຍ. ຈາກນັ້ນ ຈຶ່ງສາມາດຈັບກຸມຄົນຮ້າຍໄດ້ສຳເລັດ.

ນາງ ບົວຈັນ ຕັນທະແກ້ວ ກ່າວວ່າ: ໃນຕອນບ່າຍຂອງວັນທີ 25 ເມສາ ຕົນເອງ ແລະ ທ້າວ ພອນສະຫວັນ ຕັນທະແກ້ວ ໄດ້ເດີນທາງມາແຂວງໜອງຄາຍ ໂດຍໄປຊື້ສິນຄ້າທີ່ຫ້າງຊັບພະສິນຄ້າແຫ່ງໜຶ່ງໃນຕົວເມືອງໜອງຄາຍ, ຕໍ່ມາໄດ້ມີທ້າວ ທອງ ເຊິ່ງເປັນຄົນລາວ ແລະ ຮູ້ຈັກຮັກແພງກັນດີ ໄດ້ໂທມາບອກໃຫ້ຕົນໄປຮັບເງິນຄ່າຊື້ຂາຍໄມ້ ໂດຍຈະມີຄົນນຳເງິນມາມອບໃຫ້. ຕໍ່ມາໄດ້ມີນາງ ພັດຣະໄມ ພົມວິໄຊ ອາຍຸ 40 ປີ ຢູ່ບ້ານລຸມພຸກ ຕາແສງທ່າສີລາ ເມືອງສອງດາວ ແຂວງສະກົນນະຄອນ ໄດ້ນຳເອົາຖົງມາໃຫ້ ເຊິ່ງຕົນເອງກໍບໍ່ຮູ້ວ່າແມ່ນຖົງຫຍັງ. ຈາກນັ້ນບໍ່ດົນ ກໍມີແກ໊ງຊາຍທັງ 8 ຄົນ ອ້າງຕົວວ່າເປັນເຈົ້າໜ້າທີ່ຕຳຫລວດ ສະແດງຕົວເຂົ້າຈັບກຸມ ແລະ ແຈ້ງຂໍ້ຫາຄ້າຢາບ້າ ທັງໆທີ່ຕົນເອງບໍ່ໄດ້ມີສ່ວນກ່ຽວຂ້ອງກັບຢາເສບຕິດເລີຍ.