ເມືອງຫາດຊາຍຟອງໄດ້ຮັບຜົນເສຍຫາຍໜັກຈາກພະຍຸຝົນໃນເຊົ້າວານນີ້

     ພາຍຫລັງໄດ້ເກີດມີພະຍຸ ແລະ ຝົນຕົກຢ່າງແຮງໃນຂ້ອນແຈ້ງຂອງເຊົ້າວັນທີ 19 ກຸມພາຜ່ານມາ, ໄດ້ເຮັດໃຫ້ເຮືອນ ຊານປະຊາຊົນຫລາຍຫລັງລວມເຖິງເສັ້ນທາງ ແລະ ເສົາໄຟຟ້າຫລາຍຕົ້ນໃນຕົວເມືອງຂອງນະຄອນຫລວງວຽງຈັນ, ໄດ້ ຮັບຜົນ ເສຍຫາຍຫລາຍສົມຄວນ, ເຊິ່ງເຂດທີ່ໄດ້ຮັບຜົນກະທົບຮ້າຍແຮງກວ່າໝູ່ແມ່ນ ເມືອງຫາດຊາຍຟອງ, ໂດຍສະເພາະເສົາໄຟຟ້າໄດ້ຫັກລົ້ມລົງຂວາງທາງນັບ ແຕ່ສີ່ແຍກໄຟແດງໜອງ ໄຮໄປຈົນຮອດບ້ານສາລະຄຳ, ເຮືອນປະຊາຊົນ ຫລາຍຫລັງທີ່ຢູ່ລຽບແຄມຖະໜົນທ່າເດື່ອຖືກລົມພັດຢ່າງແຮງເຮັດໃຫ້ຫລັງຄາເຮືອນຫລຸດປີວອອກໄປກັບລົມ, ບາງ ຫລັງແກ້ວປະຕູແຕກ, ຫລັງຄາຫັກໄປຕາມໆກັນ,ໂດຍສະເພາະບັນດາຮ້ານຂາຍໜັງເຄັມຢູ່ແຄມທາງດັ່ງກ່າວແມ່ນເປ່ເພ ລຽບປານໜ້າກອງ. ນອກຈາກນີ້ ປ້າຍໂຄສະນາຫລາຍແຜນກໍໄດ້ຫັກລົ້ມທັບທາງເປັນຈຳນວນຫລາຍ.

     ນັກຂ່າວພວກເຮົາໄດ້ລົງສອບຖາມເຈົ້າຂອງເຮືອນທີ່ໄດ້ຮັບຜົນກະທົບຈາກພະຍຸຝົນຄັ້ງນີ້ ເຊິ່ງພວກເຂົາໄດ້ຕອບເປັນ ສຽງດຽວວ່າ: ບໍ່ຄິດວ່າຈະມີລົມ ແລະ ຝົນຕົກແຮງຂະໜາດນີ້ ແລະ  ກໍເປັນຊ່ວງເວລາທີ່ປະຊາຊົນພວມຫລັບນອນ ແລະ ສ້າງຄວາມເສຍຫາຍຫລາຍເປັນຈຳນວນຫລາຍ.

ທ່ານເຈົ້າເມືອງຫາດຊາຍຟອງ ບຸນທາມ ພຸດທະວົງສາ ໃຫ້ຮູ້ວ່າ:ນັບວ່າເປັນໄພພິບັດທາງທຳມະຊາດທີ່ສ້າງ ຄວາມເສຍຫາຍຫລາຍຢ່າງບໍ່ເຄີຍມີມາກ່ອນຢູ່ເມືອງຫາດຊາຍຟອງ, ເຊິ່ງພະຍຸດັ່ງກ່າວນັບວ່າຮຸນແຮງພັດ ມາພຽງບໍ່ເທົ່າ ໃດນາທີເມື່ອເວລາປະມານ 5 ໂມງເຊົ້າກໍສ້າງຄວາມເສຍຫາຍຢ່າງໜັກໃຫ້ກັບພື້ນຖານໂຄງລ່າງ ແລະ ເຮືອນຊານບ້ານ ຊ່ອງຂອງປະຊາຊົນເປັນຈຳນວນຫລາຍຮ້ອຍຫລັງ, ເຊິ່ງເຂດທີ່ໄດ້ຮັບຜົນກະທົບໜັກກວ່າໝູ່ແມ່ນເຂດບ້ານບໍ່ໂອ, ດອນ ຂາຊາຍ, ໜອງແວງ, ສົມສະໜຸກ, ສາລະຄຳ, ດົງຄຳຊ້າງ. ນອກຈາກນີ້ຍັງມີໂຮງຮຽນຫລາຍຫລັງໄດ້ຮັບຜົນເສຍຫາຍ ເຊັ່ນກັນ ແລະ ມີປະຊາຊົນຈຳນວນໜຶ່ງໄດ້ຮັບບາດເຈັບຍ້ອນຖືກເສດກະເບື້ອງຕົກໃສ່ແຕ່ກໍໄດ້ຮັບການປະຖົມພະຍາ ບານແລ້ວ ແລະ ບໍ່ມີຜູ້ເສຍຊີວິດແຕ່ຢ່າງໃດ, ປັດຈຸບັນໄດ້ສັ່ງໃຫ້ນາຍບ້ານຂອງບ້ານທີ່ໄດ້ຮັບຜົນກະທົບຮີບຮ້ອນສະ ຫລຸບຕົວເລກຜົນເສຍຫາຍພາຍໃນບ້ານຂອງຕົນໂດຍໄວ ເພື່ອລາຍງານໃຫ້ຄະນະນຳນະຄອນຫລວງຮັບຊາບເພື່ອຊອກ ຫາວິທີການແກ້ໄຂ ແລະ ຊ່ວຍເຫລືອຜູ້ໄດ້ຮັບຜົນກະທົບໜັກຈາກໄພທຳມະຊາດດັ່ງກ່າວ.